Xarici işlər naziri Elmar Məmmədyarov ABŞ Dövlət katibinin Avropa və Avrasiya məsələləri üzrə köməkçisinin müavini Bricet Brinkin rəhbərlik etdiyi nümayəndə heyətini qəbul edib
Nazir Elmar Məmmədyarov Azərbaycanın müstəqillik əldə etməsindən keçən dövr ərzində enerji, terrorizmə qarşı mübarizə, regional təhlükəsizlik və digər sahələrdə ABŞ-la uğurlu əməkdaşlığından bəhs edərək, ikitərəfli münasibətlərin daha da dərinləşdirilməsi üçün mövcud imkanların qiymətləndirilməsinin vacibliyini qeyd etdi.
Nazir ABŞ ilə əməkdaşlığın inkişaf etdirilməsində ölkəmizin maraqlı olduğunu qeyd edərək, iki ölkə arasında bütün məsələlərin dialoq və qarşılıqlı etimad şəraitində müzakirəsinin səmərəli olacağını vurğuladı.
Elmar Məmmədyarov iki ölkə arasında enerji sahəsində bir sıra irimiqyaslı layihələrin reallaşdırılması təcrübəsinin hazırda gündəmdə olan digər enerji layihələrinin uğurla tamamlanmasına töhfə verəcəyini bildirdi.
Ermənistan-Azərbaycan münaqişəsinə toxunan nazir ATƏT-in Minsk Qrupunun digər həmsədrləri ilə birlikdə ABŞ tərəfindən münaqişənin həlli istiqamətində səylərin artırılmasının vacibliyini diqqətə çəkdi.
Bricet Brink ABŞ-ın Azərbaycanla münasibətlərə xüsusi əhəmiyyət verdiyini və əməkdaşlığın inkişaf etdirilməsinə hazırlığını vurğuladı. O, səfər çərçivəsində keçirdiyi görüşlər barəsində məlumat verərək, görüşlərdə ikitərəfli əlaqələrin müxtəlif aspektləri barəsində geniş fikir mübadiləsi aparıldığını qeyd etdi.
Həmin gün xanım Bricet Brink xarici işlər nazirinin müavini Xələf Xələfov tərəfindən də qəbul edildi.
Bu qəbildən olan görüşlərin ikitərəfli əlaqələrin gücləndirilməsinə yardım etdiyini bildirən Xələf Xələfov indiyə qədər iki ölkə arasında münasibətlərin yüksək səviyyədə inkişaf etdiyini, 1997-ci ildə Azərbaycanın Ümummilli lideri Heydər Əliyevin ABŞ-a səfərindən sonra daha da gücləndiyini vurğuladı. Azərbaycanın ABŞ-ın regionda etibarlı tərəfdaşı olduğunu bildirən nazir müavini siyasi, təhlükəsizlik, iqtisadi, investisiya qoyuluşu, mədəniyyət, təhsil və humanitar sahələrdə, enerji layihələrinin həyata keçirilməsində birgə əməkdaşlıq üçün geniş imkanların mövcudluğunu qeyd etdi.
X.Xələfov ticarət sahəsində əməkdaşlığa toxunaraq, bu yaxınlarda keçirilmiş Azərbaycan-ABŞ işgüzar görüşünə qatılmış ABŞ şirkətlərinin qeyri-neft sektoruna sərmayə qoyuluşunda maraqlı olmasını vurğuladı. Bu işgüzar görüşün sərmayə qoyuluşunun və ticarət dövriyyəsinin artmasına töhfə verəcəyini qeyd etdi.
Bricet Brink ABŞ hökumətinin Azərbaycanın Əfqanıstanda sülhməramlı missiyaya yardımı və terrorizmə qarşı mübarizədə töhfəsinin yüksək qiymətləndirildiyini bildirdi.
Görüşdə qarşılıqlı maraq kəsb edən regional və beynəlxalq məsələlər ətrafında fikir mübadiləsi aparıldı.
