No:278/22, Azərbaycan Respublikası Xarici İşlər Nazirliyinin Mətbuat xidməti idarəsinin Azərbaycan Respublikası və Türkmənistan arasında diplomatik münasibətlərin qurulmasının 30-cu ildönümü münasibətilə keçirilən tədbir və sərgiyə dair məlumatı
9 iyun 2022-ci il tarixində Azərbaycan Respublikasının Xarici İşlər Nazirliyində Azərbaycan Respublikası və Türkmənistan arasında diplomatik münasibətlərin qurulmasının 30-cu ildönümü münasibətilə tədbir və sərgi keçirilib.
Tədbirdə AR XİN-in rəhbər heyəti, Türkmənistanın Azərbaycan Respublikasındakı Səfirliyinin rəhbərliyi, əməkdaşları iştirak edib.
Tədbir hər iki ölkənin dövlət himnlərinin səslənməsi ilə başlayıb.
Tədbirdə çıxış edən Azərbaycan Respublikasının xarici işlər nazirinin müavini Xələf Xələfov 30 il ərzində iki ölkənin böyük inkişaf yolu keçdiyini qeyd edib. Azərbaycan və Türkmənistan arasında ikitərəfli münasibətlərin, o cümlədən regional və beynəlxalq əməkdaşlığın dinamik şəkildə inkişaf etdiyini qeyd edən nazir müavini, bu istiqamətdə iki dövlət arasında formalaşmış qarşılıqlı etimad və hörmətin əsas faktor olduğunu bildirib. Azərbaycan və Türkmənistan arasında strateji tərəfdaşlıq xarakterli münasibətlərin mövcudluğunu məmnunluqla qeyd edən nazir müavini Xələf Xələfov iki ölkə arasında müxtəlif sahələrdə, o cümlədən siyasi, iqtisadi, ticarət və energetika sahələrində inkişafı təmin edən geniş beynəlxalq hüquqi bazanın əhəmiyyətini vurğulayıb. Nazir müavini, Xəzər dənizində “Dostluq” yatağının karbohidrogen resurslarının birgə işlənməsinin iki ölkə arasında mövcud olan dostluq və qardaşlıq münasibətlərinin daha bir nümunəsi olduğunu ifadə edib.
Daha sonra çıxış edən Türkmənistanın Azərbaycan Respublikasındakı səfiri Mekan İşanquliyev Azərbaycan və Türkmənistanı tarixi, mədəni bağların, dəyərlərin birləşdirdiyini bildirib. Hazırda Türkmənistan və Azərbaycan münasibətlərinin yeni məzmun kəsb etdiyini bildirən səfir, bu münasibətlərin siyasi, iqtisadi, həmçinin mədəni və humanitar sahələrdə özünü göstərdiyini ifadə edib. Səfir iki ölkənin iştirakı ilə həyata keçirilən regional və beynəlxalq əhəmiyyətli irimiqyaslı layihələrin Türkmənistan və Azərbaycan əməkdaşlığının yüksək sürətlə inkişaf etdiyinin göstəricisi olduğunu qeyd edib. İki qardaş ölkə arasında birgə layihələrin təşkilində növbəti yeni mərhələ olan Türkmənistan Hökuməti ilə Azərbaycan Respublikasının Hökuməti arasında Xəzər dənizində “Dostluq” yatağının karbohidrogen resurslarının birgə kəşfiyyatı, işlənilməsi və mənimsənilməsi haqqında qarşılıqlı Anlaşma Memorandumunun imzalanmasını qeyd edən səfir Mekan İşanquliyev, bunun xüsusi əhəmiyyət daşıdığını vurğulayıb.
Tədbirin sonunda iştirakçılar Azərbaycan və Türkmənistan arasında diplomatik münasibətlərin 30 illiyinə həsr edilmiş sərgi ilə tanış olublar.
