Xarici işlər nazirinin müavini Xələf Xələfov İslam Əməkdaşlıq Təşkilatının baş katibi İyad bin Amid Mədəni ilə görüşüb
X.Xələfov İslam dünyası və mədəniyyətinin bir hissəsi olan Azərbaycanın İslam Əməkdaşlıq Təşkilatı ilə münasibətlərə böyük önəm verdiyini bildirdi və İƏT tərəfindən Ermənistanın Azərbaycana qarşı təcavüzünün qəti şəkildə pislənməsinin və Azərbaycanın ədalətli mövqeyinin davamlı şəkildə dəstəklənməsinin yüksək qiymətləndirildiyini diqqətə çatdırdı.
X.Xələfov geniş və həssas coğrafiyanı əhatə edən İslam dünyasında baş verən proseslər, çağırış və problemlərin müzakirəsi və həllində İƏT-in çox vacib platforma rolunu oynadığını vurğuladı.
Baş katib İ.A.Mədəni Azərbaycana hər səfəri zamanı müşahidə edilən inkişafın xoş təəssüratlar oyatdığını deyərək, inkişaf edən Azərbaycanın ümumilikdə İslam dünyasının tərəqqisinə töhfə verdiyini diqqətə çatdırdı.
İƏT-ə üzv dövlətlərin əhatə etdiyi coğrafiya boyunca hazırkı problemli proseslərdən bəhs edən Baş katib Küveytdə keçiriləcək İƏT xarici işlər nazirlərinin toplantısında bu məsələlərin əsas müzakirə mövzusu olacağını qeyd etdi.
Bas katib bu xüsusda Yəməndə cari vəziyyətin narahatliq dogurdugunu və bu məsələnin İƏT Nazirlər Toplantisinin növbədənkənar iclasında müzakirə ediləcəyini bildirib.
Bu xüsusda, X.Xələfov Yəmənə sülh gətirəcək fəaliyyətin, ümumilikdə İƏT çərçivəsində sülhə və əməkdaşlığa xidmət edən səylərin Azərbaycan tərəfindən dəstəkləndiyini diqqətə çatdırıb.
Terrordan əziyyət çəkən bir dövlət kimi Azərbaycanın terrorçuluqla mübarizə sahəsində əməkdaşlığa xüsusi önəm verdiyini deyən X.Xələfov bu mübarizədə milli təşəbbüslərin beynəlxalq təşəbbüslərlə üst-üstə düşməsi və beynəlxalq həmrəyliyin nümayiş etdirilməsinin zəruri olduğunu diqqətə çatdırdı.
Görüşdə həmçinin İƏT-in son fəaliyyət istiqamətləri və Küveytdə keçiriləcək Nazirlər Toplantısının gündəliyi barədə fikir mübadiləsi aparıldı.