X.Xələfov ölkəmizin Almaniya ilə əlaqələrinin inkişafına xüsusi önəm verdiyini qeyd edərək, Azərbaycan Respublikasının Prezidenti cənab İlham Əliyevin Almaniyaya səfərini və səfər əsnasında keçirdiyi görüşlərin, xüsusilə Federal Kansler Angela Merkel ilə görüşünün ölkələrimiz arasında əməkdaşlığın inkişafına mühüm töhfə verdiyini vurğuladı. Azərbaycan və Almaniyanın xarici işlər nazirləri tərəfindən həyata keçirilən qarşılıqlı səfərləri, o cümlədən ATƏT-in Fəaliyyətdə olan Sədri statusunda Frank Valter Ştanmayerin bu yaxınlarında Azərbaycana ziyarətini, iki ölkənin Xarici İşlər Nazirlikləri arasında mütəmadi xarakter daşıyan siyasi məhləhətləşmələr mexanizmini qeyd edən X.Xələfov, ikitərəfli siyasi dialoqun inkişafından məmnunluğunu ifadə etdi. O, Almaniyanın Azərbaycanın əsas tərəfdaşlarından biri olduğunu qeyd edərək, ölkələrimiz arasında strateji tərəfdaşlıq müstəvisində iqtisadi, ticarət, mədəni və humanitar əlaqələrin daha da inkişafı üçün əlverişli imkanların olduğunu nəzərə çatdırdı.

O, əməkdaşlığın irəliyə doğru aparılmasında parlamentlərarası əlaqələrin mühüm rol oynadığını diqqətə çəkərək bu xüsusda Karin Ştrentsin ölkəmizə, Azərbaycan parlament nümayəndə heyətinin isə Almaniyaya səfərinin Azərbaycan və Almaniya arasında qarşılıqlı anlaşmanın və dostluğun möhkəmlənməsinə xidmət etdiyini bildirdi.

Karin Ştrents Azərbaycanda müşahidə etdiyi inkişafa münasibətdə sevincini ifadə edərək, Bakıda keçirilmiş Azərbaycan, İran və Rusiya dövlət başçılarının üçtərəfli görüşünün əhəmiyyətini vurğuladı. O, bu görüşün təşkil olunmasında Prezident İlham Əliyevin rolunu və onun digər ölkə başçıları ilə şəxsi münasibətlərini xüsusi olaraq qeyd etdi.

X.Xələfov Azərbaycan Respublikası Prezidentinin təşəbbüsü ilə Bakıda keçirilmiş Azərbaycan, İran və Rusiya üçtərəfli görüşün regional əməkdaşlıq baxımdan mühüm əhəmiyyət kəsb etdiyini və regionun tarixində yeni səhifə açdığını vurğuladı. Görüşün əhatəli gündəliyə malik olduğunu deyən nazir müavini siyasi, təhlükəsizlik, terrorizmə qarşı mübarizə, Xəzər dənizində əməkdaşlığın möhkəmləndirilməsi, nəqliyyat, sənaye, energetika və xüsusilə Şimal-Cənub nəqliyyat dəhlizinin inkişafı baxımdan əlverişli imkanlar yaratdığını bildirdi. Azərbaycanın digər region dövlətləri ilə də üçtərəfli əsasda əməkdaşlığa malik olduğunu deyən X.Xələfov bu formatda əlaqələrin bütün regionun rifahina xidmət etdiyini söylədi.

Ermənistanın təhriki və təxribatı ilə baş vermiş məlum aprel hadisələrinə toxunan X.Xələfov Ermənistan-Azərbaycan münaqişəsinin həlli istiqamətində aparılan danışıqlar prosesi, prezidentlər səviyyəsində Vyana və Sankt-Peterburqda keçirilmiş görüşlər haqqında məlumat verdi. Beynəlxalq ictimaiyyət tərəfindən mövcud status-kvonun qəbuledilməz və qeyri-davamlı hesab edildiyini deyən nazir müavini münaqişənin həll edilməməsinin region üçün ciddi təhlükə mənbəyi olduğunu diqqətə çatdırdı. Vəziyyətin yenidən gərginləşməsinin qarşısını almaq üçün status kvonun dəyişdirilməsinin və Ermənistanın Azərbaycan ərazilərinin işğalına son qoymasının vacibliyini qeyd edən X.Xələfov Azərbaycanın münaqişənin ölkəmizin suverenliyi və ərazi bütövlüyü əsasında beynəlxalq hüququn norma və prinsiplərinə uyğun olaraq danışıqlar yolu ilə həllinin tərəfdarı olduğunu bildirdi.

Azərbaycanın Avropa İttifaqı ilə əlaqələrinə toxunan X.Xələfov Cənub Qaz dəhlizinin inkişafı və Azərbaycanın Avropanın enerji təhlükəsizliyində oynadığı rola diqqəti çəkdi.

Karin Ştrents ətraflı məlumata görə təşəkkürünü ifadə etdi və iki ölkə arasında əlaqələrin inkişaf etdirilməsi üçün dostluq qrupunun fəaliyyəti və həyata keçirdiyi layihələr barədə məlumat verdi.