No:245/17, Azərbaycanın Çin Xalq Respublikasına yeni təyin olunmuş səfiri Əkrəm Zeynallı etimadnamələrini Çin Xalq Respublikasının Sədri cənab Si Cinpinə təqdim edib
Etimadnamələrin təqdim edilməsi mərasimi çərçivəsində yeni təyin olunmuş səfirin Çin Xalq Respublikasının Sədri Si Cinpinlə apardığı söhbət zamanı Ə.Zeynallı Azərbaycan Respublikasının Prezidenti cənab İlham Əliyevin ən səmimi salamlarını və xoş arzularını Çinin dövlət başçısına çatdırdı.
Ölkəsinin Çinlə münasibətlərinə xüsusi əhəmiyyət verdiyini və ikitərəfli əlaqələri bütün istiqamətlər üzrə inkişaf etdirməkdə maraqlı olduğunu bildirən səfir, Azərbaycan Prezidenti cənab İlham Əliyevin cənab Si Cinpini ölkəmizə rəsmi səfərə dəvət etdiyini xatırlatdı və səfərin yaxın gələcəkdə həyata keçiriləcəyinə ümidvar olduğumuzu diqqətə çatdırdı.
Azərbaycan Hökumətinin Çin Xalq Respublikasının Sədri cənab Si Cinpinin “Bir Kəmər, Bir Yol” təşəbbüsünü ciddi şəkildə dəstəklədiyinə diqqəti yönəldən səfir, ölkəsinin bu təşəbbüsün uğurla həyata keçirilməsinə xüsusi töhfə verməyə hazır olduğunu bildirdi.
İqtisadi sahədə əməkdaşlıq üçün geniş imkanların mövcudluğunu qeyd edən səfir Ə.Zeynallı, Çin şirkətlərini Azərbaycanla daha sıx işləməyə dəvət etdi.
Söhbət zamanı Ermənistan-Azərbaycan Dağlıq Qarabağ münaqişəsinə də toxunan səfir Ə.Zeynallı, münaqişənin həlli ilə bağlı Çinin ədalətli mövqeyinə görə təşəkkürünü bildirdi.
Səfiri yeni təyinatı münasibətilə təbrik edən Si Cinpin, Azərbaycan Prezidentinin səmimi salamlarına və xoş arzularına görə təşəkkür etdi, onun da salamlarını və xoş arzularını Azərbaycanın dövlət başçısına çatdırmasını səfirdən xahiş etdi.
Azərbaycan Respublikasının Prezidenti cənab İlham Əliyevin 2015-ci ilin dekabr ayında Çinə dövlət səfərini məmnuniyyətlə xatırladan Si Cinpin, həmin səfər çərçivəsində Azərbaycanın dövlət başçısı ilə birlikdə ikitərəfli əlaqələrin daha da inkişaf etdirilməsi üçün bir sıra vacib qərarlar qəbul etdiklərini bildirdi və bu qərarların həyata keçirilməsi üçün Prezident Əliyevlə daha sıx işləməyə əzimli olduğunu vurğuladı.
Azərbaycan Prezidentinin rəsmi səfərlə bağlı dəvətinə görə təşəkkür bildirən Si Cinpin, ölkəmizə rəsmi səfər etməkdən məmnun olacağını qeyd etdi və hər iki tərəf üçün məqbul tarixlərin diplomatik kanallar vasitəsilə razılaşdırılmasını təklif etdi.
Söhbət zamanı Çin Xalq Respublikasının Sədri cənab Si Cinpin “Bir Kəmər, Bir Yol” təşəbbüsünü ciddi şəkildə dəstəklədikləri üçün şəxsən Prezident İlham Əliyevə və Azərbaycan Hökumətinə təşəkkürünü bildirdi.
