Görüş çərçivəsində Azərbaycan və Kolumbiya Xarici İşlər Nazirlikləri arasında siyasi məsləhətləşmələrin IV raundu keçirildi.

Görüşdə iki ölkə hökumətləri arasında müxtəlif səviyyələrdə təmasların genişləndirilməsi və siyasi dialoqun davamlı şəkildə aparılması məqsədilə yüksək səviyyəli səfər mübadiləsinin əhəmiyyəti vurğulandı. Bu xüsusda, Azərbaycanda Kolumbiya Səfirliyinin və Kolumbiyada isə Azərbaycanın diplomatik nümayəndəliyinin fəaliyyətə başlamasının ikitərəfli əlaqələrimizin inkişaf dinamikasına yeni bir təkan verdiyi diqqətə çatdırıldı.

Nazir E.Məmmədyarov Azərbaycan-Kolumbiya Parlamentlərarası Dostluq Qrupu çərçivəsində əməkdaşlığın daha da inkişaf etdirilməsinə dair geniş imkanların olduğunu bildirdi. E.Məmmədyarov bu xüsusda Kolumbiya Senatının II konstitusional daimi komitəsində “Azərbaycan Respublikasının ərazisinin qanunsuz işğal edilməsi” adlı qətnamənin, həmçinin Senatın Xarici Əlaqələr Komissiyası tərəfindən Xocalı soyqırımının 25-ci ildönümü ilə əlaqədar sənədin qəbul edilməsinin yüksək qiymətləndirildiyini qeyd etdi.

Həmkarını Ermənistan-Azərbaycan münaqişəsi üzrə danışıqlar prosesinin son statusu barəsində məlumatlandıran E.Məmmədyarov münaqişənin həllində Kolumbiya tərəfinin davamlı olaraq beynəlxalq hüquq normalarına, dövlətlərin suverenliyi və ərazi bütövlüyü, sərhədlərin toxunulmazlığı prinsiplərinə əsaslanaraq Azərbaycanın ədalətli mövqeyini dəstəklədiyinə görə təşəkkürünü bildirdi.

E.Məmmədyarov həmçinin uzun müddətdir ölkədə davam edən münaqişənin sülh yolu ilə nizamlanması münasibətilə Kolumbiya xalqını təbrik etdi və əldə edilmiş sülh razılaşmasının ölkənin davamlı inkişafı üçün çoxsaylı imkanlar yaradacağına ümid etdiyini qeyd etdi.

O, ölkələrimiz arasında ticarət dövriyyəsinin iki ölkənin mövcud potensialına cavab vermədiyini qeyd edərək, ikitərəfli iqtisadi münasibətlərin inkişaf etdirilməsi məqsədilə Azərbaycan və Kolumbiya arasında ticarət-iqtisadi sahədə əməkdaşlıq üzrə birgə işçi qrupununun yaradılmasının faydalı ola biləcəyini vurğuladı.

Humanitar sahədə əməkdaşlıq üçün geniş imkanlar olduğunu bildirən E.Məmmədyarov Kolumbiya Xarici İşlər Nazirliyi tərəfindən Azərbaycan Respublikasının Xarici İşlər Nazirliyinin əməkdaşları üçün ispan dili kurslarının təşkili təşəbbüsü və dəstəyinə görə təşəkkürünü ifadə etdi.

E.Məmmədyarov turizm sahəsində də əməkdaşlığın genişləndirilməsi və dərinləşdirilməsi baxımından çoxsaylı imkanların mövcud olduğunu qeyd edərək, “ASAN Viza” sistemi vasitəsilə elektron viza verilən ölkələr siyahısına Kolumbiyanın əlavə edilməsinin kolumbiyalı turistlərin Azərbaycana səfərlərinə töhfə verəcəyinə ümidvar olduğunu dedi.

Xanım Maria Anxela Olgin Kolumbiya hökumətinin yeni tərəfdaşları ilə münasibətlərin şaxələndirilməsi xəttinə xüsusi diqqət ayırdığını deyərək, siyasi məsləhətləşmələrin də bu məqsədə xidmət etdiyini vurğuladı. O, Kolumbiyanı Azərbaycanın dostu kimi xaraketerizə edərək turizm, ticarət, sərmayələrin qoyuluşu və s. kimi sahələrin inkişafı baxımından Kolumbiyada Azərbaycan şirkətlərini görməkdən məmnun olacaqlarını əlavə etdi.

M. Olgin Azərbaycan Respublikası və hökumətinə daim sülhü dəstəklədiyinə görə təşəkkürünü bildirərək, münaqişə sonrası layihələrdə Azərbaycanla birgə əməkdaşlıq etməyə hazır olduqlarını qeyd etdi.

Nazirlər iki ölkə arasında mədəni əlaqələrin dərinləşməsinə təkan verəcək “Azərbaycan Respublikasının Mədəniyyət və Turizm Nazirliyi ilə Kolumbiya Respublikasının Mədəniyyət Nazirliyi arasında mədəniyyət sahəsində əməkdaşlıq haqqında Saziş” imzaladılar.

Görüşdə həmçinin Azərbaycan klassikləri və Kolumbiya şairlərinin əsərlərindən ibarət ispan və azərbaycan dillərində çap olunmuş Antologiyanın təqdimatı keçirildi.

Görüşdən sonra nazirlərin birgə mətbuat konfransı keçirildi.

Daha sonra nazirlər Kolumbiyanın tanınmış iş adamlarının iştirakı ilə işçi ziyafətə qatıldılar. E.Məmmədyarov ölkəmizdə aparılan maliyyə və iqtisadi islahatlar, qeyri-neft sektorunun şaxaləndirilməsi istiqamətində aparılan tədbirlər haqqında ətraflı məlumat verdi və iş adamlarını maraqlandıran suallara cavab verdi.