No:02/18, Səfir Fəxrəddin Qurbanov etimadnaməsini Xorvatiya Respublikasının Prezidentinə təqdim edib
12 yanvar 2018-ci il tarixində səfir F.Qurbanov etimadnaməsini Xorvatiya Respublikasının Prezidenti x-m Kolinda Qrabar-Kitaroviçə təqdim etdi. Rəsmi təqdimetmə mərasimindən sonra keçirilmiş görüş zamanı F.Qurbanov Azərbaycan Respublikasının Prezidenti cənab İlham Əliyevin salamlarını və xoş arzularını Prezident K.Grabar-Kitaroviçə çatdıraraq, ona tapşırılmış məsuliyyətli vəzifədə iki ölkə arasında strateji səviyyədə olan əlaqələrin yüksələn xətlə inkişafı üçün çalışacağını bildirdi.
Səfir F.Qurbanov Ümumdünya EXPO-2025 sərgisinə ev sahibliyi etmək üçün Bakı şəhərinin namizədliyinin irəli sürüldüyünü qeyd edərək, 2018-ci ilin noyabr ayında keçiriləcək səsvermədə Xorvatiyanın dəstəyini xahiş etdi. F.Qurbanov 1-ci Avropa Oyunları, 4-cü İslam Həmrəyliyi Oyunları, Formula1 və digər bu qəbildən olan beynəlxalq tədbirlərə ev sahibliyi etmiş Azərbaycanın Ümumdünya EXPO-2025 kimi mötəbər və nüfuzlu tədbirə sahiblik etmək üçün lazım olan təcrübəyə malik olduğunu vurğuladı.
Bununla yanaşı qeyd olundu ki, 2018-ci ildə Azərbaycan Xalq Cümhuriyyətinin 100 illik yubileyinin qeyd olunması ilə əlaqədar Xorvatiyada da bir sıra tədbirlərin təşkili nəzərdə tutulur. Səfir F.Qurbanov əlavə olaraq diqqətə çatdırdı ki, Zaqreb şəhərində Azərbaycan yazıçısı Qurban Səidin dünya bestselleri olan eyniadlı romanı əsasında Heydər Əliyev Fondunun vitse-prezidenti xanım Leyla Əliyeva tərəfindən ekranlaşdırılan “Əli və Nino” filmi nümayiş etdirilmiş və xorvat tamaşaçıları tərəfindən maraqla qarşılanmışdır. Sonda Səfir “Əli və Nino” kitabının xorvat dilinə tərcümə olunmuş nüsxəsini Prezident K.Grabar-Kitaroviçə təqdim etdi.
