No: 115/17, Xarici İşlər Nazirliyində Azərbaycan və Fransa arasında XİN-lərarası siyasi məsləhətləşmələr keçirilib
Məsləhətləşmələrdə Azərbaycan Respublikasını xarici işlər nazirinin müavini Xələf Xələfov, Fransa Respublikasını isə xarici işlər və beynəlxalq inkişaf nazirliyinin kontinental Avropa idarəsinin rəisi Florans Manjən təmsil edib.
X.Xələfov Azərbaycanla Fransa arasında siyasi münasibətlərin səviyyəsinin məmnunluq doğurduğunu bildirərək, ikitərəfli əməkdaşlığın uğurla inkişaf etdiyini bildirdi. Hər iki ölkə prezidentinin qarşılıqlı səfərlərini və tərəflər arasında mövcud olan siyasi dialoqu yüksək qiymətləndirən nazir müavini, əməkdaşlığın inkişafı üçün böyük potensialın olduğunu dilə gətirdi.
X.Xələfov ölkəmizdə həyata keçirilən iqtisadi islahatlar, iqtisadiyyatın şaxələndirilməsi istiqamətində görülən işlər barədə məlumat verdi və fransız şirkətlərini Azərbaycanda qeyri-neft sektorunun inkişafı ilə əlaqədar layihələrdə daha fəal iştiraka dəvət etdi. O, iki ölkə arasında mədəni və humanitar əlaqələrin inkişaf etdiyini, turizm sahəsində irəliləyişə nail olunduğunu diqqətə çatdırdı.
Florans Manjən bildirdi ki, Azərbaycan-Fransa münasibətlərini çox yüksək səviyyədədir və dövlət başçılarının səfərləri ikitərəfli əməkdaşlığa mühüm töhfələr verir. O əlavə etdi ki, iki ölkə arasında siyasi münasibətlərin yüksək səviyyəsi beynəlxalq və regional məsələləri birgə müzakirə etməyə imkan yaradır.
X.Xələfov bildirdi ki, Minsk Qrupunun həmsədr ölkəsi kimi Ermənistan-Azərbaycan Dağlıq Qarabağ münaqişəsinin həllində Fransanın rolu böyükdür. Fransanın da marağında olduğu regional inkişafa bu gün ən böyük maneə Azərbaycanın 20 faiz torpaqlarının işğalı ilə nəticələnən bu münaqişədir.
Münaqişənin həllini Fransa üçün prioritet adlandıran Florans Manjən, bildirdi ki, bu məsələ rəsmi Parisin gündəliyindədir və Fransa Minsk Qrupunun həmsədr ölkəsi kimi öhdəliklərinə sadiqdir. O, əlavə etdi ki, onun ölkəsi münaqişə tərəfləri arasında danışıqların bərpasına töhfə verməyə hazırdır və bununla əlaqədar Sammitin keçirilməsini təklif edib.
X.Xələfov, həmçinin, Azərbaycan-Avropa İttifaqı münasibətlərinin hazırkı vəziyyətinə toxundu və münasibətlərin qarşılıqlı, davamlı və uzunmüddətli olmasının vacibliyini önə çəkdi.
Görüşdə Azərbaycan-Fransa Hökumətlərarası Komissiyanın fəaliyyəti, gündəlikdə duran məsələlər müzakirə edildi və enerji sahəsində qurulmuş əməkdaşlıq təqdir edildi. X.Xələfov Azərbaycanın təşəbbüsü və iştirakı ilə həyata keçirilən nəqliyyat layihələri, o cümlədən Şimal-Cənub, Şərq-Qərb dəhlizləri barədə məlumat verdi. Florans Manjən sözügedən nəqliyyat layihələrində iştirak etməkdə, həmçinin, hava nəqliyyatı sahəsində və Azərbaycanda metronun yenidən qurulması işində əməkdaşlıqda maraqlı olduqlarını bildirdi.
Görüşdə həmçinin qarşılıqlı maraq doğuran regional və qlobal xarakterli məsələlər ətrafında geniş müzakirələr aparıldı.