Xarici işlər naziri Elmar Məmmədyarov Birləşmiş Millətlər Təşkilatının Azərbaycan Respublikasına yeni təyin olunmuş Rezident Əlaqələndiricisi və BMT-nin İnkişaf Proqramının Rezident Nümayəndəsi Qulam İsakzaini qəbul edib
Görüşdə Qulam İsakzai etimadnaməsinin surətini xarici işlər naziri Elmar Məmmədyarova təqdim etdi.
Nazir Elmar Məmmədyarov Qulam İsakzaini yeni təyinatı münasibətilə təbrik edərək, onun Azərbaycanla BMT arasında əlaqələrin daha da inkişafına töhfə verəcəyinə ümid etdiyini bildirdi. Nazir ölkəmizin BMT-nin İnkişaf Proqramı çərçivəsində əməkdaşlığının uğurla inkişaf etdiyini vurğuladı və əlaqələrin inkişafı üçün səylərin artırılmasının vacibliyi qeyd etdi.
Qulam İsakzai təmsil etdiyi qurumun Azərbaycanla əməkdaşlığı genişləndirməkdə maraqlı olduğunu bildirdi və bu istiqamətdə səylərini əsirgəməyəcəyini diqqətə çatdırdı. O, həmçinin, Azərbaycanın “ANAMA” və “Asan Xidmət” kimi qurumların təcrübəsindən digər ölkələrin faydalanmasının zəruriliyini qeyd etdi.
Nazir Elmar Məmmədyarov Azərbaycanın təşəbbüsü və iştirakı ilə son illər həyata keçirilən irimiqyaslı enerji və nəqliyyat layihələri haqqında məlumat verərək, Şərq-Qərb və Şimal-Cənub nəqliyyat dəhlizlərinin reallaşdırılması istiqamətində son dövrlər atılan addımlar barədə danışdı.
Qulam İsakzai BMT-nin bu dəhlizlərin reallaşması üçün texniki dəstək verməyə hazır olduğunu diqqətə çatdırdı.
Görüşdə qarşılıqlı maraq kəsb edən məsələlərə dair fikir mübadiləsi aparıldı.
