2021-03-30 17:25:12

No:113/21, Azərbaycan Respublikası Xarici İşlər Nazirliyinin Mətbuat xidməti idarəsinin nazir Ceyhun Bayramovun Əfqanistan İslam Respublikasının Prezidenti Zati-aliləri cənab Məhəmməd Əşrəf Qəni ilə görüşünə dair məlumatı

30 mart 2021-ci il tarixində Düşənbə şəhərində keçirilən  "Asiyanın ürəyi - İstanbul prosesi" 9-cu Nazirlər Konfransı çərçivəsində  Azərbaycan Respublikasının xarici işlər naziri Ceyhun Bayramov Əfqanistan İslam Respublikasının Prezidenti Zati-aliləri cənab Məhəmməd Əşrəf Qəni ilə görüşüb.

Əfqanistan İslam Respublikasının Prezidenti Azərbaycanı böyük Qələbə münasibətilə təbrik edərək, bu zəfərin beynəlxalq hüququn qalibiyyəti olduğunu vurğulayıb. Bu xüsusda, cənab Məhəmməd Əşrəf Qəni Azərbaycan Respublikasının Prezidenti cənab İlham Əliyevə xüsusi təbriklərini çatdırıb.

Prezident cənab Məhəmməd Əşrəf Qəni Azərbaycanın işğaldan azad edilmiş ərazilərində törədilmiş dağıntıların miqyasından xəbərdar olduğunu və bunun təəssüf doğurduğunu qeyd edib.

Nazir Ceyhun Bayramov Əfqanistan Prezidentinə təşəkkürünü bildirərək, Azərbaycan Respublikasının Prezidenti cənab İlham Əliyevin səmimi salamlarını qarşı tərəfin diqqətinə çatdırıb.

Nazir Azərbaycanın işğaldan azad edilmiş ərazilərində həyata keçirilən yenidənqurma və bərpa işlərindən bəhs edərək, yaxın gələcəkdə həyatın bu ərazilərə geri qayıdacağını vurğulayıb.  

Tərəflər Azərbaycan və Əfqanistan arasında ikitərəfli münasibətlərin inkişafını məmnunluqla qeyd ediblər. ASAN xidmətinin Əfqanistanda fəaliyyətə başlaması və gələcəkdə bu xidmətin daha geniş sahələri əhatə etməsi niyyəti, ADA Universitetində gənc əfqan diplomatları üçün təlimlərin davam etdirilməsi, habelə Lapis-Lazuli beynəlxalq nəqliyyat dəhlizinin əhəmiyyəti kimi mövzular ətrafında fikir mübadiləsi aparılıb.

Arxiv üzrə axtarış

xin diplomatic service