Braziliya Federativ Respublikası

Prezident: Zati-aliləri cənab Jair Bolsanaro

Vitse-prezident: cənab Hamilton Murao

Senatın Sədri: cənab Davi Alkolumbre

Deputatlar Palatasının Sədri: cənab Rodriqo Maya

Xarici İşlər naziri: cənab Ernesto Araujo

Azərbaycan Respublikasının Braziliyadakı fövqəladə və səlahiyyətli səfiri: cənab Elxan Poluxov

Braziliya Federativ Respublikasının Azərbaycandakı fövqəladə və səlahiyyətli səfiri: cənab Manuel Monteneqro

Azərbaycan Respublikasının Səfirliyinin rəsmi internet səhifəsi:  http://brasilia.mfa.gov.az  

İkitərəfli münasibətlər

Azərbaycan Respublikası və Braziliya Federativ Respublikası arasında diplomatik əlaqələr 1992-ci ilin 23 oktyabr tarixində qurulmuşdur. Azərbaycan Respublikasının Braziliyadakı Səfirliyi 9 may 2012-ci ildə, Braziliya Federativ Respublikasının Azərbaycandakı Səfirliyi isə 22 iyun 2009-cu ildə açılmışdır.

24-27 noyabr 2013-cü il tarixində AR xarici işlər nazirinin müavini Araz Əzimov Braziliya xarici işlər nazirinin müavini səfir Karlos Paranyos ilə Braziliada siyasi məsləhətləşmələr aparmışdır.

21 oktyabr 2018-ci il - Azərbaycan Respublikası və Braziliya Federativ Respublikası arasında diplomatik münasibətlərin qurulmasının 25 illiyi münasibətilə təbrik məktublarının qarşılıqlı mübadiləsi baş tutmuşdur.

Yüksək səviyyəli səfərlər

Xarici İşlər nazirləri

4 aprel 2006-cı il – Azərbaycan Respublikasının Xarici İşlər naziri Elmar Məmmədyarovun Braziliyaya rəsmi səfəri.

15 noyabr 2017-ci il – Braziliya Federativ Respublikasının Xarici Əlaqələr naziri Aloyzio Nunyesin Azərbaycana rəsmi səfəri.

Parlamentlərarası əlaqələr

Səfirliyimiz fəaliyyətə başladıqdan sonra Braziliya Parlamenti ilə mütəmadi olaraq iş aparılmış və nəticədə 4 sentyabr 2013-cü il tarixində Braziliya Parlamentinin Deputatlar Palatasında Braziliya-Azərbaycan Dostluq qrupu yaradılmışdır. Dostluq qrupunun sədri (2019-ci ildə yenidən təsdiq olunub) Kladio Kajadodur. 8 aprel 2014-cü il tarixində Braziliya Milli Konqresinin Senatında da  Braziliya-Azərbaycan Dostluq qrupu yaradılmışdır. Dostluq qrupunun sədri Kristovam Buarkedir. 2012-ci ildə AR Milli Məclisində Azərbaycan-Braziliya Parlamentlərarası əlaqələr üzrə Dostluq qrupu fəaliyyətə başlamışdır. Qrupun sədri Asim Mollazadədir.

3-6 mart 2016-cı il - Braziliya Senatının Elm, texnologiya, innovasiya, kommunikasiya və informatika komitəsinin rəhbəri, Braziliya-Azərbaycan Dostluq qrupunun sədri, senator Kristovam Buarke ölkəmizdə səfərdə olmuşdur.

31 oktyabr 2016-cı il -  Braziliya Federativ Respublikası Milli Konqresinin Deputatlar Palatasının sədri Rodriqo Mayanın rəhbərlik etdiyi nümayəndə heyətini Azərbaycana səfər etmişdir. Ölkələrimiz arasında dostluq əlaqələrinin inkişafında xidmətlərinə görə Braziliya Federativ Respublikası Milli Konqresinin Deputatlar Palatasının sədri Rodriqo Maya “Azərbaycan Respublikası Prezidentinin fəxri diplomu” ilə təltif edilmişdir.

 2-4 may 2019-cı il - Braziliya Federativ Respublikası Milli Konqresinin  Deputatlar Palatasının sədri Rodriqo Mayanın rəhbərlik etdiyi nümayəndə heyəti Azərbaycanda səfərdə olmuşdur. Milli Məclisin Sədri Oqtay Əsədov Braziliya Federativ Respublikası Deputatlar Palatasının sədri Rodriqo Mayanın ölkələrimiz arasında parlamentlərarası əlaqələrin və ikitərəfli əməkdaşlığın inkişafında göstərdiyi xidmətlərə görə “Azərbaycan Respublikası Milli Məclisin “Parlament Medalı” ilə təltif etmişdir.

Humanitar sahədə əməkdaşlıq

6 avqust - 8 sentyabr 2013-cü il - Braziliyada Azərbaycan bədii filmlərinin nümayişi keçirilmişdir.

22 yanvar 2015 –ci il tarixində Rio de Janeyro şəhərində “Bakı Şəhər İcra Hakimiyyəti və Rio de Janeyro şəhəri arasında Əməkdaşlıq Protokolu”  imzalanmışdır və bununla qardaşlaşmış şəhərlər elan olunmuşdur.

23-26 aprel 2015-ci il - Rio de Janeyroda Azərbaycan mədəniyyət həftəsi keçirilmişdir.

17 noyabr – 2 dekabr 2015-ci il - Porto Aleqre şəhərində 14 Azərbaycan bədii filminin nümayişi keçirilmişdir.

15 mart 2016-cı il - Rio de Janeyro şəhərində Azərbaycan Respublikasının adını daşıyan bələdiyyə məktəbi açılmışdır.

Müqavilə-hüquq bazası

Azərbaycan Respublikası ilə Braziliya Federativ Respublikası arasında 6 (altı) sənəd imzalanmışdır.