Monqolustan

Prezident: Zati-aliləri cənab Xaltmaaqin Battulqa

Baş Nazir: cənab Uxnaqiyn Xürelsüx

Parlament Sədri: cənab Qomboyavyn Zandanşatar

Xarici İşlər naziri: cənab Damdin Tsoqtbatar

Azərbaycan Respublikasının Monqolustandakı səfiri (iqamətgahı Seul şəhərində olmaqla): cənab Rəmzi Teymurov

Monqolustanın Azərbaycan Respublikasındakı  səfiri: cənab Bold Ravdan

İkitərəfli münasibətlər

Monqolustan ilə Azərbaycan arasında diplomatik münasibətlər 16 aprel 1992-ci ildə qurulmuşdur.

2016-cı ilin 19 sentyabr - Xarici işlər naziri Elmar Məmmədyarov Monqolustan xarici işlər naziri Tsend Munk Orgil ilə BMT Baş Assambleyasının 71-ci sessiyası çərçivəsində görüşmüşdür.

2017-ci il 15-19 may - BMT-nin Asiya və Sakit Okean üzrə İqtisadi və Sosial Komissiyasının (UNESCAP) “Regional əməkdaşlıq üçün dayanıqlı enerji” mövzusunda Banqkok şəhərində keçirilmiş 73-cü illik sessiyasında Azərbaycanın təşəbbüsü ilə hazırlanan və daha sonra Rusiya Federasiyasının qoşulduğu “Asiya və Sakit okean regionunda dayanıqlı enerjinin inkişafı üzrə regional əməkdaşlığın gücləndirilməsi” adlı qətnamə layihəsi yekdilliklə qəbul olunub. Qətnamənin 8 həmmüəllif ölkələrindən biri də Monqolustandır.

2017-ci il 8 iyul - ATƏT Parlament Assambleyasının Belarusun paytaxtı Minskdə keçirilən 26-cı illik sessiyası çərçivəsində Azərbaycan nümayəndə heyətinin üzvü, ATƏT PA-nın vitse-prezidenti Azay Quliyevin təşəbbüsü ilə “ATƏT PA-nın İpək Yoluna Dəstək Qrupu” təsis edilib. Monqolustan bu Dəstək Qrupununun 17 təsisçisi ölkələrindən biridir.

2018-ci il 12 mart – Azərbaycan Respublikasının xarici işlər naziri cənab Elmar Məmmədyarov ATƏT Parlament Assambleyasının İpək Yoluna Dəstək Qrupu tərəfindən təşkil olunan konfransda iştirak etmək üçün Azərbaycana gələn Monqolustanın xarici işlər naziri Damdin Tsogtbatar ilə görüşüb. Görüş zamanı ikitərəfli, regional və beynəlxalq məsələlərə dair fikir mübadiləsi aparılıb. Görüşün sonunda “Azərbaycan Respublikasının Xarici İşlər Nazirliyi ilə Monqolustan Xarici İşlər Nazirliyi arasında əməkdaşlıq haqqında Anlaşma Memorandumu” imzalanıb.

Ali və yüksək səviyyəli səfərlər

• Monqolustanın Prezidenti Xaltmaaqin Battulqa 24-28 sentyabr 2018-ci il tarixlərində Azərbaycan Respublikasında işgüzar səfərdə olub (Cüdo üzrə Dünya Çempionatı).
• Azərbaycanda keçirilən Dünya İqtisadi Forumunda iştirak etmək məqsədilə Monqolustanın xarici işlər naziri Luvsanvandan Bold 2013-cü ilin aprel ayında Bakıya səfər edib;
• ATƏT-in Parlament Assambleyasının İpək Yoluna Dəstək Qrupu tərəfindən təşkil olunan konfransda iştirak etmək uçun Monqolustanın xarici işlər naziri Damdin Tsogtbatar 11-12 mart 2018-ci ildə Bakıya səfər edib

Müqavilə-hüquq bazası

İki ölkə arasında 4 sənəd imzalanmışdır.

Azərbaycan Respublikası ilə Monqolustan arasında ticarət dövriyyəsinin, ixracın və idxalın həcmi (min ABŞ dolları)

15-17 oktyabr 2018-ci il tarixlərində Monqolustanın paytaxtı Ulan-Bator şəhərində Azərbaycan-Monqolustan birgə biznes forumu keçirilmişdir. Azərbaycan Respublikası Prezidentinin göstərişi əsasında, AR İqtisadiyyat Nazirliyi və Azərbaycanda İxracın və İnvestisiyaların Təşviqi Fondu tərəfindən keçirilmiş biznes forumunda ölkəmizin şərabçılıq, yüksək texnologiyalar, Azərkosmos, qızılçıxarma, toxuculuq, kənd təsərrüfatı və yeyinti sənayesini təmsil edən 23 şirkətin nümayəndəsi iştirak etmiş, nümayəndə heyətinə AR İqtisadiyyat nazirinin müavini Niyazi Səfərov rəhbərlik etmişdir.