2019-04-16
No:109/19, Xarici işlər naziri Elmar Məmmədyarov Polşa Seyminin Marşalı ilə görüşdü.
Polşa Respublikasına rəsmi səfəri çərçivəsində xarici işlər naziri Elmar Məmmədyarov Polşa Seyminin marşalı (spiker) Marek Kuxçinski ilə görüş keçirdi.

Seymin Marşalı nazir Elmar Məmmədyarovu səmimi salamlayaraq, 2017-ci ilin aprel ayında Azərbaycan xarici işlər nazirinin Polşaya rəsmi səfərini xatırladı və bu səfərlərin Polşa və Azərbaycan arasındakı qarşılıqlı faydalı əməkdaşlığın daha da inkişafına təkan verdiyini qeyd etdi. İki ölkə arasındakı əməkdaşlığın parlament ölçüsünün əhəmiyyətindən bəhs edən Seymin marşalı hər iki ölkədə parlament dostluq qruplarının fəaliyyət göstərdiyini vurğulayaraq, bu qrupların mütəmadi görüşlərinin keçirilməsinin mövcud əlaqələrin daha da irəli aparılması baxımından vacib olduğunu qeyd etdi.

Nazir Elmar Məmmədyarov Polşa rəsmisinə səmimi qəbula görə təşəkkür edərək iki ölkə arasında mövcud olan əməkdaşlıq, o cümlədən parlamentlərarası əlaqələrin hazırkı durumundan məmnunluq ifadə etdi. Nazir Azərbaycan Milli Məclisinin spikerinin səmimi salamarını Marek Kuxçinskinin diqqətinə çatdırdı. Elmar Məmmədyarov qarşı tərəfə Azərbaycanın təşəbbüsü və iştirakı ilə bölgədə həyata keçirilən enerji, infrastruktur layihələri, o cümlədən Cənubi Qaz Dəhlizi, habelə Cənub-Qərb nəqliyyat dəhlizi haqqında geniş məlumat verdi.

Tərəflər Avropa İttifaqının (Aİ) Şərq Tərəfdaşlığı çərçivəsində iştirak ilə bağlı fikir mübadiləsi apardılar. Nazir Elmar Məmmədyarov Polşanın Aİ üzv ölkələri arasında Azərbaycanın əsas tərəfdaş ölkələrindən biri olduğunu söylədi.

Seymin Marşalı Şərq Tərəfdaşlığının əhəmiyyətindən bəhs edərək, Avronest Parlament Assambleyası çərçivəsində müxtəlif sahələr üzrə əməkdaşlığının genişləndirilməsinin vacib olduğunu bildirdi.

Nazir Elmar Məmmədyarov bölgədə sülh və təhlükəsizliyə ciddi təhdid olan Ermənistan-Azərbaycan Dağlıq Qarabağ münaqişəsinin həlli üzrə aparılan danışıqlar prosesinin cari vəziyyəti ilə bağlı Seymin Marşalını məlumatlandırdı. Münaqişənin tezliklə həllinin bölgədə sülh, dayanıqlı inkişaf və rifahın təmin olunması baxımından vacib olduğu vurğulandı.

Xarici işlər naziri Elmar Məmmədyarov Polşa Seyminin Marşalını Azərbaycana səfərə dəvət etdi.

    

növbəti xəbər əvvəlki xəbər