“Açıq hökumət tərəfdaşlığı” vətəndaş cəmiyyətinin fəaliyyətinin dəstəklənməsi

2016-cı il sentyabrın 9-da  Azərbaycanda vətəndaş cəmiyyətinin təmsilçiləri, hökumət nümayəndələri və Milli Məclis üzvlərinin iştirak etdiyi toplantıda 31 QHT-nin və 9 hökumət nümayəndəsinin daxil olduğu Açıq Hökumətin Təşviqinə Dair Hökumət–Vətəndaş Cəmiyyəti Dialoqu Platforması (Platforma) yaradılmışdır. Platformanın məqsədi “Açıq Hökumət Tərəfdaşlığı” (AHT) Təşəbbüsünün  Azərbaycanda tətbiqinin genişləndirilməsi, dövlət orqanlarının fəaliyyətində şəffaflığın artırılması, hesabatlılığın təkmilləşdirilməsi, ictimai iştirakçılığın təşviqi və korrupsiyaya qarşı mübarizədə sosial innovasiyaların tətbiqinin genişləndirilməsi üçün dövlət orqanları və vətəndaş cəmiyyəti institutlarının səylərinin və fəaliyyətlərinin əlaqələndirilməsidir.  Adı çəkilən Platformanın fəaliyyətinin təşviq edilməsi və platformada təmsil olunmuş QHT-lərlə bağlı məlumatlılığın artırılması məqsədilə Azərbaycan Respublikası Prezidenti yanında QHT-lərə Dövlət Dəstəyi Şurasının nümayəndəsi tərəfindən Avropa İttifaqı (Aİ)-Azərbaycan ədliyyə, azadlıq, təhlükəsizlik, insan hüquqları və demokratiya alt-komitəsinin 2016-cı il oktyabrın 12-13-də Bakıda keçirilmiş 5-ci iclası çərçivəsində Aİ nümayəndə heyətinə yeni yaradılmış Platforma, eləcə də ümumilikdə ölkəmizdə vətəndaş cəmiyyətinin vəziyyətinə dair ətraflı məlumat təqdim edilmişdir.